10 აგვისტო, 2026

ლოზანა, შვეიცარია

მსოფლიო მშვილდოსნობის ფედერაციამ (World Archery) Easton Foundations-ისგან 2 მილიონი აშშ დოლარის ოდენობის დაფინანსება მოიპოვა, რაც მომდევნო ოთხი წლის განმავლობაში წევრი ასოციაციების განვითარების მხარდაჭერას მნიშვნელოვნად გაზრდის.

დაფინანსება 2026-დან 2029 წლამდე ყოველწლიურად 500 000 აშშ დოლარის გამოყოფას ითვალისწინებს. ეს თანხა ექსკლუზიურად მოხმარდება საერთაშორისო განვითარების ღონისძიებებს — ინფრასტრუქტურას, აღჭურვილობასა და ცოდნის გაზიარებას, რაც მსოფლიო მშვილდოსნობის განვითარებისა და განათლების დეპარტამენტის მეშვეობით განხორციელდება.

Easton Foundations-ს მშვილდოსნობის სფეროში ქველმოქმედების ათწლეულების ისტორია აქვს. ორგანიზაცია განსვენებულმა ჯიმ ისტონმა (Jim Easton) დააფუძნა, რომელიც 1989-დან 2005 წლამდე მსოფლიო მშვილდოსნობის პრეზიდენტის რანგში სპორტის გლობალურ გაფართოებას ხელმძღვანელობდა. ფონდი ისტორიულად უზრუნველყოფდა პროგრესს ობიექტების განვითარების, აღჭურვილობაზე ხელმისაწვდომობისა და საგანმანათლებლო გრანტების გაცემის გზით. ეს უახლესი წვლილი საერთაშორისო მშვილდოსნობის საზოგადოებასთან არსებული ხანგრძლივი პარტნიორობის გაგრძელებაა.

მსოფლიო მშვილდოსნობის პრეზიდენტმა, გრეგ ისტონმა აღნიშნა, რომ ეს ინვესტიცია ამყარებს მკაფიო ვალდებულებას, რომლის მიხედვითაც წევრი ასოციაციები ფედერაციის განვითარებისკენ მიმართული საქმიანობის ცენტრში დგანან.

სამი ძირითადი მიმართულება — ინფრასტრუქტურა, აღჭურვილობა და ცოდნა — მდგრადი ზრდის ფუნდამენტურ საფუძვლად ითვლება.

ახალი დაფინანსება მნიშვნელოვნად გაზრდის ინვესტიციებს ყველა ამ მიმართულებით. პირველი ეტაპი ფოკუსირებული იქნება „ცოდნის გაზიარების პროგრამისა“ (Knowledge Sharing Programme) და „აღჭურვილობით მხარდაჭერის პროგრამის“ (Equipment Support Programme) გაფართოებაზე, აგრეთვე მსოფლიო მშვილდოსნობის ონლაინ საგანმანათლებლო პლატფორმის ხელახალ გაშვებაზე 2026-2027 წლების ზამთრის სეზონზე.

2023 წელს დაწყებული „ცოდნის გაზიარების პროგრამა“ წევრ ასოციაციებს აკავშირებს საერთაშორისო ექსპერტებთან ისეთ სფეროებში, როგორებიცაა მწვრთნელთა მომზადება, სპორტსმენთა განვითარება, შეჯიბრებების მართვა, ადმინისტრირება და კომუნიკაციები. პროგრამა სწრაფად გაიზარდა — თუ პირველ წელს ოთხი პროექტი დაფინანსდა, მხოლოდ 2026 წლის განაცხადების პირველ რაუნდში 18 პროექტი დამტკიცდა.

„აღჭურვილობით მხარდაჭერის პროგრამა“ უზრუნველყოფს მშვილდოსნობისთვის საჭირო აუცილებელ ინვენტარს იმ წევრი ასოციაციებისთვის, სადაც აღჭურვილობის ნაკლებობა სპორტში ჩართულობის ბარიერად რჩება. 2023 წლიდან ეს დახმარება ხუთივე კონტინენტზე გავრცელდა.

გაფართოებული პროგრამების განხორციელებას უხელმძღვანელებს სირეტ ლუიკი (Siret Luik), მსოფლიო მშვილდოსნობის განვითარებისა და განათლების დეპარტამენტის ხელმძღვანელი, ოლიმპიური სოლიდარობის, სტიპენდიებისა და სხვა საგანმანათლებლო ინიციატივების პარალელურად.

გრანტის პირველ წელს კიდევ ერთი მთავარი პრიორიტეტი მსოფლიო მშვილდოსნობის ონლაინ საგანმანათლებლო პლატფორმის ხელახალი გაშვება იქნება, რაც სასწავლო და განვითარების რესურსებს უფრო ხელმისაწვდომს გახდის მწვრთნელების, მსაჯების, ადმინისტრატორებისა და სხვა პირებისთვის, რომლებიც სპორტის განვითარებაზე მუშაობენ.

მსოფლიო მშვილდოსნობის გენერალურმა მდივანმა, რაულ კალინმა განაცხადა, რომ ეს ინვესტიცია გააფართოებს იმ შესაძლებლობებს, რომლებზე წვდომაც წევრ ასოციაციებს მომავალ წლებში ექნებათ.

დეტალური ინფორმაცია ამ გაფართოებული შესაძლებლობების მისაღებად განაცხადის წარდგენის შესახებ ყველა წევრ ასოციაციას ღიად გაეზიარება. ოთხწლიანი დაფინანსების ციკლის განმავლობაში მომავალი ინვესტიციები წევრთა საჭიროებების, რეგიონული პრიორიტეტებისა და მსოფლიო მშვილდოსნობის გრძელვადიანი განვითარების მიზნების გათვალისწინებით განაწილდება, რაც უზრუნველყოფს უწყვეტ და თანაბარ მხარდაჭერას.

გრანტის პირველი ტრანში, 500 000 აშშ დოლარი, უკვე მიღებულია, რაც აღნიშნული ინიციატივების დაუყოვნებლივ გაფართოების საშუალებას იძლევა.

გამჭვირვალობისთვის: მსოფლიო მშვილდოსნობის პრეზიდენტი გრეგ ისტონი ამავდროულად Easton Foundations-ის პრეზიდენტიცაა. მან ააცილა თავი როგორც მსოფლიო მშვილდოსნობის მიერ გრანტის მოთხოვნის პროცესს, ისე ფონდის მიერ მისი დამტკიცების გადაწყვეტილებას.

მსოფლიო მშვილდოსნობის პრეზიდენტმა გრეგ ისტონმა განაცხადა:

„მსოფლიო მშვილდოსნობა იმისთვის არსებობს, რომ ემსახუროს თავის წევრ ასოციაციებს. ჩვენი პასუხისმგებლობაა გავიგოთ, რა სჭირდებათ ჩვენს წევრებს, ჩავდოთ ინვესტიცია იქ, სადაც ყველაზე დიდ შედეგს მივაღწევთ და მივცეთ მათ ინსტრუმენტები მშვილდოსნობის მდგრადი განვითარებისთვის მთელ მსოფლიოში.“

„ეს დაფინანსება საშუალებას გვაძლევს ეს ამოცანა ბევრად მასშტაბურად განვახორციელოთ. თუ ჩვენი წევრი ასოციაციები გაძლიერდებიან, მშვილდოსნობაც გაძლიერდება.“

Easton Foundations-ის აღმასრულებელმა დირექტორმა კენ ლეინმა განაცხადა:

„Easton Foundations-ი ერთგულია მშვილდოსნობის განვითარების იდეისა, აღჭურვილობასა და ცოდნაზე წვდომის გაზრდის, ორგანიზაციების გაძლიერებისა და ადგილობრივ დონეზე სპორტის მშენებლობის შესაძლებლობების შექმნის გზით. მოხარულნი ვართ, მხარი დავუჭიროთ მსოფლიო მშვილდოსნობას წევრი ასოციაციებისთვის რესურსების გაზრდასა და ამ საქმიანობის გავლენის გაფართოებაში მთელ მსოფლიოში.“

მსოფლიო მშვილდოსნობის გენერალურმა მდივანმა რაულ კალინმა განაცხადა:

„აღმასრულებელი საბჭოს, ჩვენი ღონისძიებებისა და განვითარების პერსონალის სახელით, მინდა ღრმა მადლიერება გამოვხატო Easton Foundations-ის მიმართ. ამ მასშტაბის წვლილი — ორი მილიონი დოლარი ოთხი წლის განმაბლობაში — არის საგანგებო ინვესტიცია ჩვენს შესაძლებლობაში, მდგრადად განვავითაროთ სპორტი გლობალურ დონეზე.“

„ჩვენი პრიორიტეტია უზრუნველვყოთ, რომ წევრმა ასოციაციებმა იგრძნონ ამ პროგრამების რეალური, პრაქტიკული სარგებელი. 'ცოდნის გაზიარებისა' და 'აღჭურვილობით მხარდაჭერის' ინიციატივები უკვე იძლევა მათ საჭიროებებზე რეაგირების პრაქტიკულ გზებს. ეს დაფინანსება საშუალებას გვძლევს, ეს დახმარება უზარმაზარ მასშტაბამდე გავზარდოთ და ამავდროულად გავაძლიეროთ საგანმანათლებლო რესურსები, რომლებიც ხელმისაწვდომია მთელი საერთაშორისო მშვილდოსნობის საზოგადოებისთვის.“